"Montesquieu n'Asturies: l'espíritu de les lleis produz espolios" ye'l nome de la conferencia que va protagonizar Amable Concha.
 
L'abogáu va dividir la charra en trés partes. Na primera va averar a los presentes al conceutu xurídicu de costume y a los sos dos elementos: el material y l’espiritual. Asina desplicará con un exemplu per toos conocíu les llendes ente costume y usu social, pa terminar falando de la evolución del reconocimientu de la costume como fonte nel derechu modernu.
 
Nel segundu bloque va tratar del orixe y calter de los vezos xurídico-públicos asturianos, del procesu de formación de los mesmos y d’un sistema pal derechu consuetudinariu públicu asturianu. Y, pa finar, fadrá un análisis de la situación anguaño, la vixencia d’esi bloque normativu, y encamentaránse unes midíes que podríen ser positives pal caltenimientu de les nueses costumes xurídico-públiques, "yá que’l mundu rural asturianu nun va llograr la sobrevivencia si nun se conserven unes normes que nacieron con elli y lu ficieron xorrecer", apunten dende Ástura.
 
Esta interesante charra del Llicenciáu en Derechu pola Universidad Complutense de Madrid y doctor en Derechu Públicu pola Universidá d’Uviéu, con Suficiencia Investigadora n’Antropoloxía Social pola Universidad de Cantabria, va celebrase mañana, a les 20 hores, nel Atenéu Obreru de Xixón (Cuadonga, 7), con entrada llibre. La conferencia ta enmarcada na actividá mensual de l'Asociación Cultural Ástura sobre temes venceyaos a la cultura asturiana y al país.

L'historiador Iván Muñiz López va poner esti martes en Xixón la conferencia 'Cuadonga y los oríxenes del Reinu d'Asturies. Una perspeutiva arqueolóxica'.
 
"La batalla de Cuadonga foi ún de los fechos que marquen tradicionalmente los oríxenes del Reinu d'Asturies y de la Edá Media. A partir del so recuerdu, nesta conferencia fadráse una nueva valoración d'esta dómina clave y clisante col encontu de les conocencies y datos apurríos nos últimos años pola ciencia y col importante protagonismu de los avances n'arqueoloxía", espliquen dende l'Asociación Cultural Ástura. Muñiz López va ser l'encargáu d'esplicar "qué hai de cierto y qué de falso nel mitu de Cuadonga, y sobre qué realidaes foron iguaos los mitos asturianos".
 
Asina, Ástura "quier entrugase poles caberes aportaciones de l'arqueoloxía medieval y algamar l'enquiz de la cuestión: ¿puede construyise una identidá dende los bilordios?". La cita ver ser esta tarde, a les 20 hores nel Atenéu Obreru de Xixón (Cuadonga, 7), con entrada llibre.
 
Codireutor de les escavaciones nel castiellu de Gauzón
 
Muñiz López, doctor cum laude n'Historia y premiu estraordinariu fin de carrera, ye profesor de la UNED y investigador del grupu Arqueos de la Universidá d'Uviéu. Anguaño codirixe les escavaciones nel castiellu de Gauzón y trabaya como direutor cultural nel Muséu de la Mina d'Arnáu.
 
Ésta ye la so segunda participación del historiador nes charres mensuales d'Ástura. Nel mes de xunu protagonizó una esceicional conferencia sobre la primer esplotación de carbón mineral de la Península Ibérica, de nome 'El mar que se volvió negro. La mina de Arnao: arqueología del paisaje minero-industrial en Asturias’.

Esti martes va celebrase una conferencia nueva de les entamaes por Ástura con periodicidá mensual nel Atenéu Obreru de Xixón. Ramón d’Andrés protagoniza nesta ocasión la ponencia, que se va centrar nes ‘Verdaes y mentires alredor de les llingües’.
 
El profesor titular de Filoloxía Española y Asturiana na Universidá d’Uviéu va desfacer les fataes y boberíes que percuerren la sociedá tocante a les llingües nuna intervención que se presenta perintersante, como toes nes que participa. El llinguaxe humanu y la diversidá de llingües nel mundu ye oxetu d’estudiu de la llingüística, una disciplina que trabaya pel métodu científicu. En más d’un sieglu d’esistencia, la llingüística científica fixo bien de descubrimientos sobre la naturaleza del llinguaxe humanu y les llingües, que dexaron a un llau falses creyencies nesti campu. Sin embargu, munches d’estes idees falses siguen mui vives y condicionen el debate intelectual na nuestra sociedá. Nesta conferencia vamos facer un pequeñu catálogu d’estes creyencies pseudocientífiques, diseccionándoles y desmintiéndoles a la lluz de la llingüística científica.
 
La conferencia va repetir horariu, esto ye, a les 20 hores, y va celebrase nel llocal del Atenéu Obreru de Xixón, asitiáu nel primer pisu del númberu 7 de la cai Cuadonga. D’Andrés, el so protagonista, ye ún los mayores espertos en llingua asturiana. Foi corredautor de les Normes Ortográfiques y del Diccionariu de la Llingua Asturiana, y ponente de la Gramática de la Llingua Asturiana, obres de l’Academia de la Llingua Asturiana. Tamién ye miembru de númberu de la mesma y correspondiente del Real Instituto de Estudios Asturianos (RIDEA), y coordina’l grupu d’investigación Seminariu de Filoloxía Asturiana, de la Universidá d’Uviéu.
 
D’igual forma, ye direutor de los proyeutos Estudiu de la Transición Llingüística na Zona Eo-Navia, Asturies (ETLEN) y del Observatoriu Asturianu de Neoloxía y Terminoloxía (AsturNeo), y miembru del comité de redaición de la Revista de Filoloxía Asturiana y de la Xunta Asesora de Toponimia del Principáu d’Asturies. Hasta esti mesmu mes presidía la Fundación Caveda y Nava, disuelta tres casi 14 años de trabayu tres considerar cumplida la misión pola que se creó.

Faustino Zapico y David Guardado van protagonizar esti martes la primer conferencia de la tercer temporada de charres entamaes por Ástura. Ésta va centrase na figura d’Alfonso Enríquez.
 
Baxo’l nome de 'El tiempu d'Alfonso Enríquez. Una revisión contestualizada d'un momentu decisivu na historia baxomedieval asturiana', l’historiador y filólogu, de manera respeutiva, van falar del que fora conde de Noreña y fíu illexítimu del primer rei Trastámara, “una de les figures más importantes y decisives de la historia d'Asturies” pese al desconocimientu que tienen d’él munchos asturianos, según apunten dende l’asociación cultural. Magar de ser estudiáu por historiadores como Juan Uría Ríu, Juan Uría Maqua o Luis Suárez entovía queden munches incógnites sobre la so persona, “los sos cambiantes proyectos, la so rellación cola condesa Isabel, les sos aliances con ingleses y portugueses, o sobre la so muerte, probablemente nel exiliu francés”.
 
Tres una revisión de ls fontes orixinales y l'accesu a dellos documentos poco conocíos, Zapico y Guardado –autor que nel marcu del so trabayu ‘Había un conde n’Asturies. Personaxes asturianos na lliteratura baxomedieval francesa’, entovía n’imprenta, analizó distintes fontes orixinales rellacionaes col condáu de Noreña y l’hermanu de Juan I– “contestualizarán nesta conferencia’l tiempu d’Alfonso Enríquez nun marcu asturianu, peninsular y européu y apurrirán dalgunos datos qu’ayudarán a una meyor conocencia d’una figura y un momentu históricu apasionantes que paga la pena analizar y revisar ensin prexuicios”. Hai que recordar qu’una una respuesta direuta a les rebeliones afalaes pol conde, que provocaron n'Asturies una guerra civil ente los partidarios d'Enríquez y los del rei de Castiella, llevó a la creación del Principáu d’Asturies, fechu tamién desconocíu anguaño por bona parte de la sociedá asturiana, y que les aiciones del fíu illexítimu d’Enrique II “enxerten a Asturies como un suxetu activu nel contestu bélicu européu enmarcáu na guerra de los 100 años”. Les consecuencies del so fracasu “definirán l'encaxe d'Asturies nel marcu del reinu de Castiella nos sieglos posteriores”.
 
La charra d’esta tarde recupera l’horariu habitual d’estes sesiones d’Ástura: 19.30 hores nel llocal del Atenéu Obreru de Xixón, asitiáu na cai Cuadonga númberu 7. La entrada ye llibre.